الفقر بين الصدقة والحاجة في رمضان

ماذا يحتاج الفقير في رمضان

قصة يرويها صاحب حق في اموال الاغنياء .....

بما انه احنا داخلين على رمضان وبما انه بهذا الشهر بتكتر الصدقات وطرود الخير وبيصير الكل بيسعى لكسب الاجر والثواب وبيروح الواحد للسوبر ماركت اللي جنبه ويطلب من صاحب المحل انه يجهز له طرد سواء كان ب 5 دنانير او 10 او حتى 20 وبيكون حاسس حاله كانه ادى الرسالة ، بس يا ترى انت شفت اللي جوا الطرد شو الموجود ؟ طبعا صاحب المحل بيكون حكى لك انه فيه رز وسكر وزيت ومعكرونة وملح وفاصوليا وعدس وملح وشوية معلبات ، بس بذمتك انت بتقبل انك تطعمي هاي النوعية من المواد لاهل بيتك لانه بيكون الملح مرطب والمعكرونة من ارخص الانواع اللي لما بتسلقها بتتكسر هاد غير طعمها حتى المعلبات بتكون من ارخص الانواع
ما حدا يحكيلي شحاد وبتشرط ، انا فقير اه بس مش شحاد انا فقير اه بس الي حق في مالك قدام رب العالمين لانه رزقتي مش انا اللي كتبتها لحالي هاي ارزاق ربنا كتبها وانا مش قاعد انا بشتغل وبتعب لكن رزقي قليل شو اسوي مضطر اقبل الصدقة علشان تعيني على هالغلا وهالطلبات اللي ما بتخلص ، وبعدين انت تعاملك مش معي انت تعاملك مع رب العالمين احمل هاي الكرتونة واتخيل حالك بيوم القيامة واقف قدام ربنا شوف حالك كيف راح يكون موقفك !!!

وبعدين لما انت تعطيني طرد وهو يعطيني طرد وهداك يعطيني طرد ويصير عندي 5 _ 6 طرود بالبيت وبعدين ، هي الحياة بس اكل والله العام كان عندي اكياس رز من الصدقات كفتني لاكتر من 6 شهور . اذا بدك تساعني ادفع عني جزء من ايجار البيت ، ساعدني بسداد الدين اللي علي يا سيدي بلاش خد فاتورة الدوا هاي واصرف لي اياها يمكن هي ما بتكلف هالمبلغ بس والله لما بيصح لي 10 دنانير وبمسكها بيكون مفتوح مية باب وباب لالها اقولك بلاش هاد كله ، سيارة الغاز اللي بتمر من باب بيتك ادفع حق جرة وخليها معاه واحكي للشوفير يعطيها لحدا محتاج .

يحتاج الفقير للمال من بداية الشهر الكريم

وبعدين زكاة العيد لما بتطلعها ليلة العيد او صباحية العيد انا شو بدي فيها متى بدي الحق اشتري لبسة لهالاولاد او اشتري كيلو طحين للمرة تعمله للاولاد معمول ما انا كمان بدي افرح اولادي ولا فرحة العيد لناس وناس .

ويختم بالإعتذار

سامحوني اذا كلامي ما عجبكم بس والله من غلبي ولانكم بتعاملونا كانكم تفضلتوا علينا وكانه احنا بلا كرامة الفقر مش عيب الفقر مش بايدنا انا والله لو بايدي لصرت ملياردير بس هاي الارزاق مش بايدنا وانا ما بقصر والله بشتغل وبتعب وكله من صحة بدني والله ما معي حق العلاج ..
انشر ولك الأجر